O Concello de Boqueixón desexa a todos os seus veciños e veciñas unha Feliz Noite de San Xoán, na que está prevista a realización de 54 cacharelas no municipio. Neste sentido, lamentamos que este ano non se poida facer o acto de entrega do lume sagrado tal e como estaba previsto, pero as condicións meteorolóxicas non o permitiron, así como obrigaron a cancelar a agardada Cerimonia do Lume Sagrado. Agardamos ter máis sorte para o ano que vén.

Así mesmo, o Concello de Boqueixón lembra algunhas recomendacións para esta noite do 23 ao 24 de xuño, como que a hora límite para rematar a celebración será as 3:30 horas da madrugada (de acordo co disposto no artigo 5.f)
da Lei 10/2017, do 27 de decembro, de espectáculos públicos e actividades recreativas do Galicia). Ademais, a persoa responsable da cacharela deberá adoptar as seguinte medidas de precaución:

1. A fogueira gardará as distancias mínimas que establece a lexislación de prevención de incendios forestais a vivendas, vehículos, instalacións, tendidos eléctricos ou telefónicos e zonas vexetais susceptibles de ser queimadas.
2. A súa dimensión non superará os 5 metros de altura e os 3 metros de diámetro.
3.  Non se queimarán residuos perigosos ou tóxicos tipo pneumáticos, aceites, plásticos, envases de aerosois, etcétera.
4. En ningún caso se botarán ao lume recipientes que conteñan líquidos inflamables ou gases a presión (sprais), aínda que estean baleiros
5. Disporase no lugar dun sistema de extinción de incendios axeitado á proporción da fogueira.
6. A fogueira permanecerá vixiada ata a súa total extinción que deberá se asegurada empapando os restos totalmente con auga.
7. No caso de que se levante vento que poda dificultar a vixilancia e extinción da fogueira esta deberá suspenderse ou apagarse de inmediato.
8. O solicitante será sempre o responsable dos danos e prexuízos que a fogueira ocasione.
9. Será obrigatoria a limpeza dos espazos públicos autorizados ao remate da actividade, incluídos os elementos utilizados para o desenvolvemento do mesmo, inmediatamente despois de rematar a cacharela e/ou sardiñada.
10. No caso de problemas chamarase ao 085 ou 112.