A situación sanitaria actual impide a celebración da Festa da Filloa de Lestedo, que este ano chegaría á súa edición 38. Porén, dende a Asociación Cultural da Filloa de Lestedo, en colaboración co Concello de Boqueixón, apostan por conmemorar dalgún xeito esta data tan sinalada no calendario festivo.
Para iso, dende a organización veñen de poñer en marcha o concurso de fotografía dixital ‘Filloarte’. Esta proposta desenvólvese a través da fan page de Facebook da Festa da Filloa de Lestedo (https://www.facebook.com/filloaoficial) e consta de dúas partes. A primeira, comprende a remisión de fotografías e a segunda, as votacións.
Así, as persoas interesadas teñen ata o 18 de febreiro ás 23.59 horas para remitir ata un máximo de dúas fotografías por participante ao enderezo electrónico festadafilloadelestedo@gmail.com. As bases do certame, que se poden consultar tanto na propia fan page de Facebook como na web do Concello de Boqueixón (www.boqueixon.gal) contemplan como requisitos mínimos que as fotografías inscritas leven dous títulos:
- Título 1: “Filloarte: Filloa de Lestedo 2021”
- Título 2: (o que designe o/a autor/a da fotografía).
O contido e a temática das fotografías recollerá algún dos seguintes aspectos/ momentos/ criterios: a elaboración das filloas, presentacións emplatadas de filloa/s, creatividades en base ás filloas, etc Nas fotos só poden aparecer imaxes da creación, non poden aparecer imaxes de persoas.
Ademais, no propio correo electrónico, a persoa participante deberá achegar información sobre os seus datos de contacto (nome e apelidos -ou sobrenome – e teléfono), así como un texto resumo onde indique os títulos da/s fotografía/s.
Tras a remisión de todas as imaxes participantes, crearase un álbum fotográfico con todas as propostas. Publicarase o propio día en que se celebraría a Festa da Filloa (domingo 21 de febreiro) e ata o día 7 de marzo ás 23.59 horas establecerase un período de votacións. Aquelas imaxes que reciban máis gústame serán as gañadoras dos tres premios do concurso:
- 1º premio: Vale de 200 euros para canxear nos establecementos de Boqueixón.
- 2º premio: Vale de 100 euros para canxear nos establecementos de Boqueixón.
- 3º premio: Vale de 50 euros para canxear nos establecementos de Boqueixón.
As persoas vencedoras anunciaranse pola propia fan page de Facebook da Festa da Filloa, logo de realizarse o reconto de votacións.
Estrea de páxina web
Por outra banda, a Asociación Cultural da Festa da Filloa de Lestedo porá en marcha unha páxina web sobre a celebración. Nela incluirase tanto información sobre a creación da festa, así como detalles sobre a elaboración da Filloa de Lestedo, o Entroido da Ulla e tamén imaxes das últimas edicións.
