O Concello de Boqueixón presenta os horarios das actividades deportivas para adultos que terán lugar nos centros socioculturais de Camporrapado, Ledesma e Lestedo, así como no ximnasio municipal do Forte. Unha instalación que reabrirá as súas portas mañá mércores despois de que o Concello acometera unha serie de melloras para os veciños e veciñas.

De feito, mañá mércores 5 de outubro será unha xornada de portas abertas para que as persoas usuarias poidan acceder as instalacións e comprobaren as novas funcionalidades e o material do que se dispón. Así, o renovado ximnasio municipal conta cunha nova sala de multideporte enfocada ao adestramento funcional e dotada co material propio para a práctica deste tipo de actividades. Ademais, o Concello de Boqueixón instalou un sistema de control de acceso para as persoas socias e usuarias da instalación.

Durante a xornada de reapertura haberá persoal que informará ás persoas asistentes sobre horarios, novas actividades e uso do novo sistema de acceso, con códigos personalizados.