O Concello de Boqueixón decretou dous días de loito oficial en sinal de pesar pola morte do escritor e intelectual Xosé Neira Vilas, Fillo Adoptivo do concello dende o ano 2014. A medida adoptouse en sinal de recoñecemento á magnífica e relevante aportación do autor á nosa literatura e conta co consenso manifestado por tódolos membros da corporación.
Neira Vilas amosou sempre un forte compromiso intelectual, social e cultural co municipio. O Executivo mostrou o seu profundo pesar pola irreparable perda dun home que gañou un merecido lugar na historia de Boqueixón e de Galicia, ademais de ser un exemplo a seguir polas futuras xeracións na defensa dos valores e da cultura galega.
“Galicia perdeu a un grande da súa literatura pero Boqueixón acaba de perder un fillo” declarou, Ovidio Rodeiro , quen trasmitíu as súas condolencias á familia e aos máis achegados.
Durante o sábado e o domingo as bandeiras ondearán a media asta e suspenderanse todos os actos oficiais programados polo concello, en sinal de dor.